काठमाडौं , आज माघ १ गते, देशभर माघे सक्रान्ति (माघी) पर्व विशेष उत्साहका साथ मनाइँदैछ। हिन्दू धर्मावलम्बीहरूले विशेषगरी सूर्यको दक्षिणायन समाप्त भई उत्तरायण सुरु हुने दिनको रूपमा यो पर्वलाई विशेष मान्यता दिएका छन्।
यस दिन स्नान, दान, पितृ तर्पण, र विशेषगरी तिल, चाकु, घ्यू, तरुल, र खिचडी खाने परम्परा रहेको छ। देशका विभिन्न नदी तथा तीर्थस्थलमा स्नान गरी पूजा–अर्चना गर्ने परम्परा पनि छ। त्रिशूली, कालीगण्डकी, नारायणी, वाग्मती, र अन्य तीर्थस्थलमा श्रद्धालुहरूको भिड लागेको छ।
थारू समुदायमा यो पर्वलाई ूमाघीू नामले चिनिन्छ। यो समुदायले माघीलाई नयाँ वर्षका रूपमा समेत मनाउँछन्। यस अवसरमा थारू समुदायमा नयाँ लुगा लगाउने, मीठा परिकार खाने, तथा नाचगान गरेर उल्लासपूर्ण वातावरण सिर्जना गर्ने चलन छ।
यसैगरी, नेवार समुदायले यस दिनलाई ‘घ्युचाकु संल्हु’ भनेर विशेष पर्वका रूपमा मनाउँछन्। उनीहरूले घ्यू र चाकु खाएर पर्व सुरु गर्ने परम्परा मान्दै आएका छन्।
माघे सक्रान्ति स्वास्थ्यका दृष्टिले पनि महत्वपूर्ण मानिन्छ। चिसो मौसममा तिल, चाकु, र घ्यूले शरीरलाई न्यानो बनाउने विश्वास गरिन्छ। यस दिन गरिएका स्नान र दानले धार्मिक लाभ मात्र नभई समाजमा एकता र सहयोगको भावना बढाउने विश्वास गरिन्छ।
सरकारले यो पर्वलाई राष्ट्रिय पर्वका रूपमा मान्यता दिएको छ, जसका कारण विभिन्न स्थानमा छुट्टाछुट्टै कार्यक्रमहरू आयोजना भएका छन्।