काठमाडौं : नेपाली एमएमए खेलाडी रवीन्द्र ढाँटले यूएफसीको छनोट प्रतियोगिता ‘रोड टु यूएफसी ५’ मा शानदार जित हात पारेका छन् ।
चीनको मकाउमा जारी प्रतियोगिताअन्तर्गत ब्यान्टमवेट विधाको क्वाटरफाइनलमा ढाँटले फिलिपिन्सका फाइटर किम्बर्ट अलिन्टोजोलाई दोस्रो राउन्डमै नकआउट गर्दै सेमिफाइनल यात्रा तय गरेका हुन् ।
प्रतिस्पर्धाको सुरुदेखि नै आक्रामक देखिएका ढाँटले दोस्रो राउन्डमा शक्तिशाली प्रहार गर्दै विपक्षीलाई पराजित गरेका थिए । नेपाली खेलाडीले अन्तर्राष्ट्रिय स्तरको प्रतिष्ठित प्रतियोगितामा उत्कृष्ट प्रदर्शन गरेपछि नेपाली खेलकुद क्षेत्रमा खुसी छाएको छ ।
यूएफसीमा स्थान बनाउने लक्ष्यसहित प्रतिस्पर्धा गरिरहेका ढाँटको यो जितलाई नेपाली एमएमएका लागि महत्वपूर्ण उपलब्धिका रूपमा हेरिएको छ ।