डडेल्धुरा : डडेल्धुराको आलिताल गाउँपालिकामा १० औं राष्ट्रिय योग दिवस भव्य रूपमा मनाइएको छ।
स्वस्थ समाज, समृद्ध नेपाल र विश्व शान्तिका लागि योग भन्ने नाराका साथ आयोजित कार्यक्रममा आयुर्वेद शाखाको आयोजना र आलिताल गाउँपालिकाको सहयोग रहेको थियो।
कार्यक्रममा आलिताल गाउँपालिका वडा नम्बर ८ का अध्यक्ष धन बहादुर देउबाको विशेष उपस्थिति रहेको थियो। योग गुरुहरू पदम डालामगर र कृष्ण दत्त जोशीले कार्यक्रमलाई सञ्चालन गर्दै विभिन्न योग आसनहरू प्रदर्शन गराएका थिए।
स्थानीयवासीको उत्साहजनक सहभागिता रहेको यस कार्यक्रममा योग अभ्याससँगै योगको स्वास्थ्य र मानसिक लाभका विषयमा जानकारी प्रदान गरिएको थियो। कार्यक्रममा सहभागीहरूले योगले शारीरिक र मानसिक स्वास्थ्यमा सकारात्मक प्रभाव पार्ने विश्वास व्यक्त गरेका थिए।
यो कार्यक्रमले स्वस्थ समाज निर्माणमा योगको महत्वलाई उजागर गर्ने उद्देश्य पूरा गरेको आयोजकले जनाएको छ।