असार २६— भारतको हिमाचल राज्यस्थित शिमलामा पहिरोमा परी एकै परिवारका तीन जना नेपालीको मृत्यु भएको छ ।
शिमला जिल्लाको क्यारा भन्ने ठाउँमा सोमबार पहिरोमा परी रुकुम पश्चिमका तीन जनाको मृत्यु भएको हो ।
रुकुम पश्चिमको त्रिवेणी गाउँपालिका—९ खहरे, टुमीबोटका दीपबहादुर वली, श्रीमती भीमा वली र छोरा मोहन वलीको पहिरोमा परी मृत्यु भएको हो । केही दिनयता हिमाचललगायत उत्तर भारतका केही क्षेत्रमा भारी वर्षा भइरहेको छ ।
बाढीपहिरोमा परी कम्तीमा २२ जनाको मृत्यु भएको भारतीय सञ्चारमाध्यमले उल्लेख गरेका छन् ।
