डडेल्धुरा, फागुन ३ : डडेल्धुरा उद्योग वाणिज्य संघका पूर्व अध्यक्ष कालीप्रसाद जोशी मृत अवस्थामा फेला परेका छन्।
फागुन १ गतेदेखि सम्पर्कविहीन रहेका जोशी शनिबार दिउँसो अमरगढी नगरपालिका-२, कुस्माली खोलामा अवस्थित पानी घट्टको छेउमा मृत अवस्थामा फेला परेका हुन्।
जोशी डडेल्धुरा जिल्ला अमरगढी नगरपालिका-२, भेल निवासी ६० वर्षीय उद्योगी हुन्। उनी फागुन १ गते बिहान ११:०० बजेपछि परिवार तथा साथीसँग सम्पर्कमा नरहेको जनाइएको थियो।
जिल्ला प्रहरी कार्यालय डडेल्धुराका प्रहरी निरीक्षक उपेन्द्र बमका अनुसार शव फेला परेपछि प्रहरीले घटनास्थलमा पुगेर अनुसन्धान सुरु गरेको छ। जोशीको मृत्युको कारण खुल्न बाँकी रहेको र घटनाबारे विस्तृत अनुसन्धान भइरहेको प्रहरीले जनाएको छ।
