डोटी-डडेल्धुराको पवित्र भूमि गहनानमा भव्य धार्मिक अनुष्ठान हुँदै

डडेल्धुरा : डडेल्धुरा र डोटी जिल्लाको संगमस्थल शिखर नगरपालिका–१० स्थित पवित्र तीर्थस्थल गहनान त्रिवेणी धाममा “श्रीमद देवी भागवत महापुराण ज्ञान धन धन्याञ्चल लक्ष्य हवन महायज्ञ २०८१” आयोजना हुने भएको छ।

आयोजक समितिका अनुसार महायज्ञ चैत १७ गतेदेखि २५ गतेसम्म सञ्चालन हुनेछ। मूल आयोजक समितिका अध्यक्ष ललित बलायरका अनुसार धार्मिक, सामाजिक, ऐतिहासिक, र पर्यटकीय महत्त्वलाई उजागर गर्दै क्षेत्रको समग्र विकासमा टेवा पुर्याउने उद्देश्यले यो धार्मिक अनुष्ठान आयोजना गरिएको हो।

गहनान क्षेत्रको पौराणिक महत्त्व :

गहनान त्रिवेणी धाम सेती र शाकल्य नदीको संगमस्थल हो, जहाँ शाकल्य ऋषिले तपस्या गरी ज्ञान आर्जन गरेको मानिन्छ। साथै, यो स्थान पाण्डवहरूले वनवासका क्रममा ध्यान र तपस्या गरेको स्थल भएको धार्मिक विश्वास छ।

महायज्ञका प्रमुख कार्यक्रमहरू

महायज्ञको उद्घाटन पूर्वप्रधानमन्त्री तथा नेपाली कांग्रेसका सभापति शेरबहादुर देउवाले गर्ने तय भएको छ। साथै, मुख्य वाचकका रूपमा आध्यात्मिक गुरु पण्डित श्री ऋषिकेश उपाध्याय रहनेछन्। महायज्ञ अवधिभर विभिन्न धार्मिक तथा सांस्कृतिक कार्यक्रम आयोजना गरिनेछ, जसअन्तर्गत:

तुलादान, अन्नदान, गौदान

आरती सेवा, विशेष पूजा

ब्राह्मण पूजन, ब्राह्मण भोजन, प्रसाद वितरण

ब्रतबन्ध, योग विज्ञान शिविर

शालिग्राम पूजन, देवी भागवत कथा प्रवचन

झाँकी प्रदर्शन, बाल संस्कार कार्यक्रम, भजन(कीर्तन आदि

व्यवस्थापन र सहभागिता : 

महायज्ञमा करिब २ लाखभन्दा बढी दर्शनार्थी सहभागी हुने अपेक्षा गरिएको छ।

कार्यक्रम सम्पन्न गर्न करिब १ करोड रुपैयाँ खर्च हुने अनुमान छ।

व्यवस्थापनका लागि २० वटा उपसमिति गठन गरी जिम्मेवारी बाँडफाँड गरिएको छ।

महायज्ञको संरक्षकत्व डडेल्धुराको गन्यापधुरा गाउँपालिका, नवदुर्गा गाउँपालिका र डोटीको शिखर नगरपालिकाले गरेका छन्।

सहयोगका लागि सुदूरपश्चिम प्रदेशका ८८ वटै पालिकाहरूलाई आह्वान गरिएको छ।

धार्मिक पर्यटन प्रवर्द्धनको लक्ष्य : 

महायज्ञबाट गहनान त्रिवेणी धामलाई हिन्दू धर्मावलम्बीहरूको प्रमुख आस्थाको केन्द्रका रूपमा विकास गर्ने लक्ष्य राखिएको छ। साथै, यस अनुष्ठानले डोटी–डडेल्धुराको धार्मिक महत्त्व उजागर गर्दै सुदूरपश्चिमको पहिचानमा योगदान पुर्याउने विश्वास गरिएको छ।

विशेष सम्मान कार्यक्रम

महायज्ञमा योगदान गर्ने दाताहरूलाई सम्मानपत्र प्रदान गरिने तथा उनीहरूको नाम शिलापत्रमा अंकित गरिनेछ।

यस धार्मिक अनुष्ठानले गहनान त्रिवेणी धामलाई पर्यटन गन्तव्यका रूपमा विकास गर्न टेवा पुर्याउने आयोजकहरूको अपेक्षा छ।