डडेल्धुरा — डडेल्धुरामा स्थानीय तहबाटै राष्ट्रिय परिचयपत्र वितरण सुरु गरिएको छ। यसअघि जिल्ला प्रशासन कार्यालय तथा इलाका प्रशासन कार्यालय जानुपर्ने बाध्यता रहेकोमा अब सर्वसाधारणले आफ्नै पालिकाबाट परिचयपत्र प्राप्त गर्न सक्ने भएका छन्।
राष्ट्रिय परिचयपत्र तथा पञ्जिकरण विभागद्वारा २०७७ सालमा सञ्चालन गरिएको दर्ता शिविरमा विवरण दर्ता गराएका नागरिकलाई हाल परिचयपत्र वितरण भइरहेको हो। प्रमुख जिल्ला अधिकारी चोमेन्द्र न्याउपानेका अनुसार जिल्ला प्रशासन कार्यालय डडेल्धुराले जिल्लाका सातै स्थानीय तहबाट परिचयपत्र वितरण थालिएको जानकारी दिए।
पालिकाबाटै वितरणले सहजता
२०७७ सालमा वडा स्तरमै सञ्चालन गरिएको शिविरमा करिब ६० हजार नागरिकले बायोमेट्रिक विवरण दिएका थिए। ती विवरणका आधारमा बनेका परिचयपत्र जिल्लामा प्राप्त भएपछि स्थानीय तहमार्फत वितरण सुरु गरिएको हो। पञ्जिकरण शाखाका प्रमुखहरूलाई तालिम दिएर वितरण प्रक्रिया अगाडि बढाइएको न्याउपानेले बताए।
उनका अनुसार, कार्यालयमा ६० हजारभन्दा बढी परिचयपत्र भण्डारण भएका कारण सम्बन्धित पालिकामा नै पठाएर वितरण गर्ने व्यवस्था मिलाइएको हो। यसले नागरिकलाई डडेल्धुरा जिल्ला सदरमुकामसम्म धाउनु नपर्ने सुविधा प्रदान गरेको छ।
आइतबारदेखि अमरगढी नगरपालिकाको वडा नं. ८ मा वितरण सुरु गरिएको प्रमुख प्रशासकीय अधिकृत लक्ष्मीप्रसाद उपाध्यायले बताए। त्यस्तै, गन्यापधुरा गाउँपालिकाले वडा नं. २ बाट र आलिताल गाउँपालिकाले वडा नं. ८ बाट परिचयपत्र वितरण थालेका छन्। अजयमेरु गाउँपालिका, परशुराम नगरपालिका, र नवदुर्गा गाउँपालिका र भागेश्वरगाउँपालिकामा पनि चाँडै वितरण सुरु गर्ने तयारी भइरहेको छ।
आलिताल गाउँपालिकामा मात्रै ८,३१६ जना नागरिकका परिचयपत्र प्राप्त भइसकेका छन्। पञ्जिकरण शाखा प्रमुख शेरबहादुर देउबाका अनुसार, हाल वडा नं. ८ बाट वितरण सुरु गरिएको छ र क्रमशः अन्य वडामा पनि सूचना जारी गर्दै वितरण गरिनेछ। गाउँपालिका अध्यक्ष शेरसिंह पार्कीले पालिकाबाटै वितरण हुन थालेपछि नागरिकलाई ठूलो सहजता भएको बताए।
जैविक परीक्षण गरेर मात्रै परिचय पत्र
राष्ट्रिय परिचयपत्र वितरण प्रक्रियामा वैज्ञानिक विधि अपनाइएको छ। नागरिकता जस्तो सिफारिसका आधारमा होइन, जैविक परीक्षण (बायोमेट्रिक डाटाका आधारमा) मात्र परिचयपत्र वितरण गरिने पञ्जिकरण विभागले जनाएको छ। नागरिकता वितरणमा देखिएको फर्जी काम रोक्न, परिचयपत्र लिने व्यक्तिले अनिवार्य रूपमा स्वयं उपस्थित हुनुपर्ने व्यवस्था मिलाइएको छ।
डडेल्धुरामा स्थानीय तहबाटै राष्ट्रिय परिचयपत्र वितरण सुरु भएसँगै नागरिकलाई सेवा लिन सहज भएको छ। लामो दूरी यात्रा गरेर प्रशासन कार्यालय पुग्नुपर्ने झन्झट हटेको छ भने वैज्ञानिक विधिले परिचयपत्रको विश्वसनीयता पनि बढाएको छ।
