डडेल्धुरा – आगामी आर्थिक वर्ष २०८२/०८३ को साउन महिनादेखि सामाजिक सुरक्षा भत्ता लिन बायोमेट्रिक प्रणाली अनिवार्य हुने भएको छ।
आलिताल गाउँपालिकाको पञ्जीकरण शाखा प्रमुख शेरबहादुर देउवाका अनुसार, भत्ता नविकरणका क्रममा लाभग्राहीहरूले अनिवार्य रूपमा उपस्थित भई बायोमेट्रिक प्रणालीबाट विवरण अद्यावधिक गर्नु पर्ने बताए।
सामाजिक सुरक्षा भत्ता वितरण कार्यविधि २०८२ को प्रभावकारी कार्यान्वयनका लागि आज गाउँपालिकाभित्र रहेका सबै आठ वडाका सचिवहरूलाई बायोमेट्रिक डिभाइस हस्तान्तरण गर्दै आवश्यक तालिमसमेत प्रदान गरिएको पञ्जीकरण शाखा प्रमुख देउवा बताए ।
यद्यपि, “सामाजिक सुरक्षा भत्ता वितरण कार्यविधि २०८२” अनुसार १६ वर्ष नपुगेका बालबालिका, आफैं हेरचाह गर्न नसक्ने अशक्त व्यक्तिहरू र ९० वर्ष माथिका जेष्ठ नागरिकलाई भने बायोमेट्रिक अनिवार्य नहुने उल्लेख छ।
बिभागले सामाजिक सुरक्षा भत्ता वितरण प्रणालीलाई थप प्रभावकारी, पारदर्शी र व्यवस्थित बनाउने उद्देश्यले बायोमेट्रिक प्रणाली लागू गर्न लागेको जनाइएको छ ।
