काठमाडौं — सुदूरपश्चिम प्रदेशसहित देशका केही स्थानहरूमा रातिदेखि नै वर्षा भइरहेको छ। बिहानपख कैलाली, कञ्चनपुर र सिन्धुपाल्चोकमा ठूलो पानी परे पनि अहिले भने वर्षा केही कम भएको मौसम पूर्वानुमान महाशाखाले जनाएको छ।
हाल बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा हल्का वर्षा जारी छ। महाशाखाका अनुसार आज दिउँसो लुम्बिनी, कर्णाली, सुदूरपश्चिम लगायत देशका पहाडी भू–भागका केही स्थानमा र बाँकी भू–भागका थोरै स्थानमा मेघगर्जन र चट्याङसहित हल्कादेखि मध्यम वर्षा हुन सक्छ।
बागमती, गण्डकी, लुम्बिनी र सुदूरपश्चिम प्रदेशका एक–दुई स्थानमा ठूलो वर्षा हुन सक्ने पूर्वानुमान गरिएको छ। साथै राति गण्डकी प्रदेशका केही स्थानमा पनि ठूलो पानी पर्ने सम्भावना रहेको महाशाखाले जनाएको छ।
