धनगढी– बाजुरामा एक बालिकामाथि सामूहिक बलात्कार भएको प्रहरीले बताएको छ । बुढीगंगा नगरपालिका घर भएकी अन्दाजी १६ बर्षीया बालिकामाथि तीन जनाले सामूहिक बलात्कार गरेको आरोपमा उजुरी परेको छ।
माघ २१ गते साँझ घरनजिकै सडकमा हिँड्दै गरेकी बालिकालाई जबरजस्ती गरेर तीन जनाले सामूहिक बलात्कार गरेको उजुरीमा उल्लेख गरिएको प्रहरीले जनाएको छ ।
पीडित पक्षले घटना भएको ४ दिनपछि माघ २५ गते तीन जनाविरुद्ध जिल्ला प्रहरी कार्यालय बाजुरामा जाहेरी दिएका छन् । बलात्कारको आरोपमा बुढीगंगा नगरपालिका ६ बस्ने अन्दाजी २५ वर्षका मार्सल थापा, २३ वर्षका किरण थापा र ४० वर्षका दीर्घ थापाविरुद्ध जाहेरी दिएका हुन् ।
जिल्ला प्रहरी कार्यालयका अनुसार आरोपित तीनै जना अहिले फरार रहेका छन् । बालिकामाथि भएको सामूहिक बलात्कारको विषयमा आवश्यक अनुसन्धान र फरार रहेका आरोपितहरूको खोजी कार्य जारी रहेको बाजुरा प्रहरी कार्यालयले जनाएको छ ।
