डडेल्धुरा १३ भाद्र
डडेल्धुराको परशुराम नगरपालिकाका स्वास्थ्यकर्मीहरुका तिन दिने क्षमता बिकास सम्बन्धी तालिम सम्पन्न भएको छ ।
युनिसेफ नेपालको सहयोग र बास नेपालको आयोजनामा परशुराम नगरपालिका अन्तर्गतका स्वास्थ्यकर्मीलाई तिन दिने तालिम मंगलबार सम्पन्न भएको हो ।
समापन कार्यक्रममा बोल्दै नगरपालिका उप प्रमुख बिमला कुमारी महताले स्वास्थ्यकर्मीलाई तीन दिने तालिमले नगरपालिकाको स्वास्थ्य क्षेत्रमा टेवा पुर्याउने बताइन् । उनले पालिकाका दुर्गम बस्तिहरुमा अझैपनी धेरै बालबालिकाले खोप नपाएको हुँदा त्यस क्षेत्रमा स्वास्थ्यकर्मीहरुले ध्यान दिनुपर्ने बताउदै तालिमले स्वास्थ्यकर्मीको व्यक्तिगत व्यवहार, कार्यशैलीमा परिवर्तन आउने र त्यसले समुदायमा सकरात्मक प्रभाव पर्ने विश्वास समेत व्यक्त गरिन् ।
यस्तै समापन कार्यक्रममा नगरपालिका स्वास्थ्य शाखा प्रमुख तेजबहादुर सिंहले नगरपालिका अन्तर्गतका स्वास्थ्यकर्मीहरुका लागि आयोजना गरिएको क्षमता अभिवृद्धि तालिमको आयोजना गर्ने संस्था युनिसेफ नेपाल र बास नेपाललाई धन्यवाद दिदै उनले सामाजिक व्यवहार परिवर्तन र खोप अभियानका क्षेत्रमा काम गर्न स्वास्थ्यकर्मीहरुलाई थप उर्जा प्राप्त भएको बताए ।
यस्तै युनिसेफ नेपालका प्रकाश आचार्यले स्वास्थ्य अन्तर्गत हुने कार्यमा सहकार्य गर्दै स्वास्थ्यको पहुँचमा रहेका व्यक्तिलाई स्वास्थ्य सेवा पहुँचमा ल्याउन सहयोग गर्ने बताए । उनले स्वास्थ्य सुचकहरु सुधार गर्न पहल तथा पैरवी गर्न तालिमले फाइदा पुग्ने बताए ।
बास नेपालका अनुगमन अधिकृत हरि प्रसाद जोशीले धन्यवाद ज्ञापन गर्दै नगरपालिका स्वास्थ्यकर्मीहरुका लागि आयोजना गरिएको तालिमले सामाजिक व्यवहार परिवर्तनका लागि सहयोग पुग्ने र नगरपालिकासंग निरन्तर सहकार्य गरेर अगाडी बढ्ने बताए ।
आइतबारदेखि सुरु भएको तालिममा परशुराम नगरपालिकाका २० जना स्वास्थ्यकर्मीहरुको सहभागिता रहेको थियो । तालिम अवधिमा सामाजिक ब्यवहार परिवर्तनका विभिन्न बिषयमा युनिसेफ नेपालका प्रकाश आचार्य, प्रशिक्षक अशोक जोशी र बासका हरि प्रसाद जोशीले सहजिकरण गरेका थिए ।
परशुराममा स्वास्थ्यकर्मीका लागि तिन दिने क्षमता अभिबृद्धी तालिम शुरु
