धनगढी– अछाम घर भएकी बालिका भारतमा आफन्तबाटै बलात्कृत भएकी छिन् । भारतको गुजरातस्थित सुरतमा रोजगारी गर्न गएका बुवा आमासँगै रहेकी १२ वर्षीया बालिका बलात्कृत भएको जिल्ला प्रहरी कार्यालय अछामले जनाएको छ ।
बलात्कारमा संलग्न करिब ४५ वर्षीय पुरुष निकटका आफन्त नै रहेको प्रहरीको दाबी छ। ती आरोपित आफन्तको नाममा उजुरी परेपछि घटना बाहिर आएको हो ।
प्रारम्भिक रूपमा बालिकामाथि करिब ७ महिना पहिले बलात्कार भएको अनुमान गरिएको छ । ‘बुवा आमासहित बालिका भारतमै थिइन् । भारतमै एक नेपाली पुरुषले बालिकालाई बलात्कार गरेको उजुरी परेको छ’ जिल्ला प्रहरी कार्यालय अछामका प्रमुख प्रहरी नायब उपरीक्षक ईश्वरी प्रसाद भण्डारीले भने, ‘जबरजस्ती करणीमा मुद्दा परेको छ । हामी त्यही अनुसार अनुसन्धान गरिरहेका छौँ ।’
बालिकाको पेट बढ्दै गएपछि मात्रै घटनाबारे थाहा भएको अनुसन्धानमा खटिएका एक प्रहरी अधिकारीले बताए । बालिकाले आफूमाथि पटक पटक बलात्कार गरिएको बताएको प्रहरीको भनाइ छ ।
अहिले बालिकाको गर्भमा करिब ३३ हप्ता भन्दा बढीको बच्चा रहेको अस्पताल स्रोतले जानकारी दिएको छ । बालिकामाथि बलात्कार भएको घटना पनि बलात्कार भएको करिब ५–६ महिना पछि थाहा भएको थियो ।
आरोपित पुरुषको खोजी गर्न प्रहरीले पहल सुरु गरेको छ । नेपाल बाहिरको घटना भएको र आरोपित पनि भारतमै रहेको हुँदा उनलाई पक्राउ गर्न भारतीय प्रहरीसँग अछाम प्रहरीले सहकार्य गरिरहेको छ ।
प्रहरी हेडक्वार्टरले भारतीय दूतावाससँग समन्वय गरेर इन्टरपोलमार्फत पनि आरोपितलाई पक्राउ गर्ने तयारी थालेको जनाएको छ ।
