धनगढी : कैलालीमा करेन्ट प्रवाह गरेर माछा मार्ने क्रममा एक युवकको दुःखद मृत्यु भएको छ। जिल्लाको लम्कीचुहा नगरपालिका–६ बागमाराका २५ वर्षीय अर्जुन भुलको सोमबार साँझ करेन्ट लागेर ज्यान गएको प्रहरीले जनाएको छ।
प्रहरीका अनुसार भुल घर नजिकै रहेको तराइला नदीमा करेन्ट प्रवाह गरी माछा मार्ने क्रममा अचानक आफैं करेन्टको चपेटामा परेका थिए। गम्भीर घाइते भएका उनलाई तत्काल उपचारका लागि अस्पताल पुर्याइएको भए पनि उपचारकै क्रममा मृत्यु भएको बताइएको छ।
करेन्ट प्रयोग गरेर माछा मार्ने कार्य कानुनी रूपमा निषेधित हुनुका साथै अत्यन्त जोखिमपूर्ण मानिन्छ। यस्ता गतिविधिले मानवीय क्षतिसँगै नदी तथा जलचर वातावरणमा समेत गम्भीर असर पार्ने गर्दछ।
घटनाप्रति स्थानीयवासीले दुःख व्यक्त गरेका छन् भने प्रहरीले घटनाबारे थप अनुसन्धान गरिरहेको जनाएको छ।