२५ भदौ, काठमाडौं । जेनजी आन्दोलनका क्रममा मंगलबार भएको तोडफोड र आगजनीपश्चात् राजधानी काठमाडौंका सडकमा नेपाली सेना गस्तीमा उत्रिएको छ। राति १० बजेदेखि सेनासहित विभिन्न सुरक्षा निकाय परिचालित भई उच्च सतर्कता अपनाइएको हो।
सुरक्षाकर्मीहरूले घरबाहिर वा गल्लीमा निस्किएका सर्वसाधारणलाई विना कारण बाहिर ननिस्किन आग्रह गर्दै घर फर्काइरहेका छन्। यद्यपि आकस्मिक सेवामा संलग्न चिकित्सक, स्वास्थ्यकर्मी तथा आपत्कालीन काममा संलग्न व्यक्तिलाई परिचयपत्रका आधारमा हिंडडुल गर्न छुट दिइएको छ।
प्रदर्शनकारीहरूले आगो लगाएको संसद भवन वरपर सेना परिचालन गरिएको छ र सर्वसाधारणलाई प्रवेशमा रोक लगाइएको छ। साथै अन्य संवैधानिक अंग र सरकारी कार्यालय वरपर पनि सेना तथा सुरक्षाकर्मीहरूको गस्ती बढाइएको छ।
