कञ्चनपुर : कञ्चनपुरका २४ वर्षीय विद्यार्थी स्वर्गीय विपिन जोशीको स्मृतिमा भीमदत्त नगरपालिकाले शालिक स्थापना गर्ने निर्णय गरेको छ। विपिनको घर जाने सडकस्थित पूर्व–पश्चिम राजमार्ग र ब्रह्मदेव लिङ्क सडकको मुख्य चोकलाई ‘विपिन जोशी चोक’ नामकरण गरी सोही स्थानमा शालिक निर्माण गरिनेछ। शालिकका लागि नगरपालिकाले दुई लाख रुपैयाँ बजेट विनियोजन गरेको छ भने आगामी वर्ष थप बजेटको व्यवस्था गरिनेछ।
सुदूरपश्चिम विश्वविद्यालयका विद्यार्थी विपिन ‘लर्न एन्ड अर्न’ कार्यक्रमअन्तर्गत इजरायल पुगेका बेला हमासको आक्रमणमा बन्धक बनाइएका थिए। बन्धक अवस्थामै उनको निधन भएको थियो र गत कात्तिकमा हमासले उनको शव हस्तान्तरण गरेको थियो।
