कैलाली : कैलालीको गोदावरीमा बस र मोटसाइकल ठोक्किँदा पूर्व वडा अध्यक्ष पूर्णबहादुर ऐरको मृत्यु भएको छ ।कैलालीको गोदावरी नगरपालिका -४ बुढीतोलामा बस र मोटसाइकल ठोक्किँदा डडेल्धुराको आलिताल गाउँपालिका-१ का पूर्व वडा अध्यक्ष ५५ वर्षीया पूर्णबहादुर ऐर को मृत्यु भएको हो ।
घटना पछि उनलाई उपचारका लागि धनगढीस्थित सेती प्रादेशिक अस्पताल ल्याइएको थियो , घाइते ऐरको उपचारको क्रममा सेती प्रादेशिक अस्पतालमा मृत्यृ भएको अस्पतालले बताएको हो ।
इलाका प्रहरी कार्यालय मालाखेतीका डिएसपी गंगाबहादुर थापाका अनुसार उत्तरबाट दक्षिणतर्फ गइरहेको सुदूरपश्चिम प्रदेश ०२-००१ ख १२८७ नम्बरको बस र सुपप्र ०१-०११ प ९४६७ नम्बरको विपरीत दिशातर्फ आइरहेको मोटरसाइकल ठोक्किएका हुन् । बस चालक भने फरार छन् । उनको खोजी भइरहेको बताइएको छ । दुबै सवारीसाधन प्रहरीको नियन्त्रणमा रहेका बताइएको छ ।
मृतक ऐरको परिवारले भने दोषी सम्पर्कमा नआए सम्म शव नउठाउने बताएका छन् । अहिले ऐरको शव धनगढीस्थित सेती प्रादेशिक अस्पतालको शवघरमा राखिएको छ । ऐर २०७४ सालको स्थानिय तहको चुनावमा एमालेबाट आलिताल गाउंपालिका वडा न. १ को वडा अध्यक्षमा निर्वाचित भएका थिए ।
