धनगढीः बझाङमा आगामी वैशाख १५ गते हुने उपनिर्वाचनका लागि प्रमुख राजनीतिक दलहरूले तयारी थालेका छन्।
एमालेले बझाङमा दमनबहादुर भण्डारीलाई उम्मेदवार बनाउने निर्णय गरेको छ। आइतबार बसेको एमालेको सचिवालय बैठकले उम्मेदवार चयन गर्नुका साथै सत्ता गठबन्धनमा सहभागी दलहरूको समर्थन जुटाउने कसरत थालेको हो।
नेपाली कांग्रेसले भने उम्मेदवारको अन्तिम टूंगो लगाइसकेको छैन ,तेस्तै सत्ता गठबन्धनमा रहेका माओवादी र एकीकृत समाजवादीले पनि उम्मेदवार अघि सार्ने कि नसार्ने निर्णय लिएका छैनन्।
बझाङ प्रतिनिधिसभा निर्वाचन क्षेत्र नम्बर १ को प्रदेशसभा १ मा आगामी वैशाख १५ गते उपनिर्वाचन हुँदैछ। नेपाली कांग्रेसबाट विजयी पृथ्वीबहादुर सिंहको गएको असार ५ गते सवारी दुर्घटनामा निधन भएपछि सो क्षेत्र रिक्त छ।
निर्वाचन आयोगले वैशाख १५ गते उपनिर्वाचन गर्ने तय गरिसकेको छ। स्वीकृत निर्वाचन कार्यतालिकाअनुसार चैत २२ गते अन्तिम मतदाता नामावली प्रकाशन गरिनेछ। चैत २४ गते उम्मेदवारको मनोनयन दर्ता र २७ गते उम्मेदवारको अन्तिम नामावली प्रकाशन गरी निर्वाचन चिन्ह वितरण गरिने, २८ गतेदेखि २०८१ वैशाख १२ गतेसम्म प्रचारप्रसारको अवधि रहने कार्यतालिका छ।
वैशाख १५ गते बिहान ७ देखि बेलुका ५ बजेसम्म मतदान गर्ने निर्वाचन आयोगको योजना छ। नेपाली काँगे्रसले उम्मेदवारको अन्तिम टूंगो लगाइसकेको छैन भने एमालेले उम्मेदवार बनाएका भण्डारी अहिले जिल्ला कमिटी बझाङका अध्यक्ष हुन्। २०५४ सालमा मटेला गाविसको निर्वाचित अध्यक्ष भएका उनी २०५५ सालमा जिल्ला कमिटी सदस्य, निर्वाचन क्षेत्र १ को क्षेत्रीय कमिटी सचिव थिए।
२०६२ साल राष्ट्रिय युवासंघ नेपाल अञ्चल कमिटी सचिव, २०६९ साल सातौं जिल्ला अधिवेशनबाट नेकपा एमाले जिल्ला कमिटी सचिव हुँदै हाल पार्टी जिल्ला अध्यक्ष छन्। २०५१ र २०६४ सालमा नेकपा एमालेबाट निर्वाचित नेकपा एकीकृत समाजवादीका भानुभक्त जोशी अहिले नेकपा एमालेकै उम्मेदवारलाई हराएर प्रतिनिधिसभा सदस्य छन्। तेस्तै इलाम–२ को उपनिर्वाचनका लागि एमालेले दिवंगत नेता सुवासचन्द्र नेम्बाङका छोरा सुहाङ नेम्बाङ लाई अघि सारीसकेको छ ।
